Qloballaşan dünyada media landşaftının köklü dəyişməsi, açıq məlumat mənbələrinin informasiya axınına
təsirinin güclənməsi, müxtəlif media platformalarına münasibətdə istehlakçı davranışlarının bir-birindən
fərqlənməsi, eləcə də ictimai rəyə alqoritm əsaslı təsir alətlərinin formalaşması bu gün informasiya mühitində
məsuliyyətli vətəndaşlığın təbliğini, media məhsullarının istehlakında və istehsalında etik standartların qorunmasını, dezinformasiyaya qarşı mübarizədə effektiv yanaşmanın tətbiqini, bütün bunların fonunda “media
savadlılığı” anlayışının xüsusi diqqətdə saxlanılmasını, onun gücündən hərtərəfli istifadəni zəruri edir.
3-cü Şuşa Qlobal Media Forumu məlumatların ictimaiyyətə düzgün, şəffaf və etibarlı şəkildə çatdırılması ilə
bağlı innovativ yanaşmaların öyrənilməsi, günümüzdə qlobal miqyasda təhdid hesab edilən dezinformasiyaya
qarşı cəmiyyətin sayıqlığının artırılması, informasiya dövriyyəsi prosesində iştirak edən bütün tərəflərin
məsuliyyətinə diqqət çəkilməsi, həqiqəti axtarmağın və qorumağın metodlarının araşdırılması, informasiya
təhlükəsizliyinin təmini, media savadlılığının bütün bu proseslərdəki rolu və gücünün araşdırılması, sosial
media və ictimai etimad məsələlərinə dair müxtəlif ölkələrdən olan rəsmilər, media və vətəndaş cəmiyyəti,
dövlət və biznes nümayəndələri, media azadlığı üzrə müdafiəçilər, beynəlxalq təşkilatların təmsilçiləri, media
ekspertləri üçün müzakirə və birgə hərəkət platforması rolunu oynayacaqdır.
Forum bütün qonaqları informasiya təhlükəsizliyinin təmin edilməsi və ictimai etimadın gücləndirilməsində
media savadlılığının rolunu, bu anlayışa münasibətdə innovativ yanaşmaları araşdırmağa çağırır, daha
məlumatlı və məsuliyyətli cəmiyyət qurmaq üçün strategiyaların müzakirəsi ilə bağlı qarşılıqlı əməkdaşlıq
əlaqələrinin qurulmasını və gücləndirilməsini dəstəkləyir.